Uia mai rā ko hea te whare nei e

Ko Te Whare-reo o Tūkarere

Taku whare-kōrero,

Taku whare-tikanga,

Taku whare okioki e

Ko te tūāpapa

Ko ngā tikanga a rātou mā

Kia pūmau ai, kia tika rawa ai te tū o taku whare

Ko te Tāhūhū

Te mātauranga a ngā tūpuna

Te aronga whānui e

Heke iho, heke iho

Ki ngā poupou

Ngā poukōrero

Ngā poutāwharau

Ngā pou o te ako e

Ko Te Poutuarongo

Ka whakatōngia te mauri o te reo

Kia tiritiria kia poupoua ki Te Pūtaketanga e!

Te Poutokomanawa

He maunga wairua

Ka tokona te reo ki te whatumanawa

Tokotoko! Titia! Ko Te Rōnakitanga e!

Ko Te Poutāhū

Ka wānangahia ngā whakairinga kōrero

Ngā whaka-rākei

Ngā whaka-niko-niko

Hei tikitiki mōu, mō Te Aupikitanga e

Ka korowaitia ki ngā kura o tēnei kaupapa e

Ka kake atu koe ki runga i te whare

Hei tekoteko, hei poutiaki

Ko Te Pīnakitanga e…
Tau ana!