Tēnei te aroha ka piki ki te nui

Kei hea koia hei taahu hei piringa mō te kūkū

E whaea mā, e pā mā, tirohia tonu tia

Kua riro rā te momo, te tangata

Kua riro kei Paerau, ki te Reinga, kei te pouritanga

E hahau ana, e tangi ana ki te ao mārama

Ki ngā maunga, ki ngā moana, ki ngā whare kōrero

E tangi kau ana te mapu e

Tēnei au, e te aroha nei, te tangi nei ki runga o Rangiuru

Whakamau ana te titiro atu ki runga o Maketū

E haruru ana, e papaki ana ngā tai o te moana

Koia pea nāna nei i tukituki ngā wairua haere

A ka riro ki te pō

Aku pikitanga, aku heketanga i runga o te Kaharoa

Ngā takahanga, ngā nohoanga o tini tūpuna

A ko te Mangakino, ko Ngāenganui kei roto ko Waiari

Ko Parawhenuamea te pukaitanga o ngā taniwha

Kei Kenana te moengaroa o Ngāti Moko o Tapuika me Tūhourangi e